Dekani i Fakultetit të Shkencave Islame, Prof. Dr. Abdulxhemil Nesimi, mori pjesë në Konferencën Shkencore me temë: “El-Ihtijar dhe roli i tij në mendimin juridik islam”, e cila u mbajt në Tiranë, me rastin e botimit të kolanës së veprës madhore “El-Ihtijaru li Ta‘lili el-Muhtar”.

Në këtë ngjarje shkencore dhe akademike morën pjesë personalitete të larta të bashkësive fetare islame nga trevat shqiptare, ndër të cilët:

• Kryetari i Bashkësisë Fetare Islame të Republikës së Maqedonisë së Veriut, H. Hfz. Shaqir ef. Fetahi,

• Myftiu i Republikës së Kosovës, Mr. Nezim Tërnava,

• Kryetari i Komunitetit Mysliman të Shqipërisë, H. Bujar Spahiu.

Konferenca mblodhi gjithashtu drejtues të institucioneve fetare, myftinj, profesorë universitarë dhe studiues nga të tri qendrat shqiptare, duke e shndërruar këtë aktivitet në një forum të rëndësishëm shkencor dhe bashkëpunues.

Kumtesa e Dekanit

Dekani i Fakultetit të Shkencave Islame u paraqit me kumtesën shkencore me titull:
“Vlera shkencore dhe pedagogjike e veprës ‘El-Ihtijar’ në mësimdhënien e jurisprudencës islame”.

Në paraqitjen e tij, Dekani trajtoi:

• rëndësinë e shkencave juridike të Sheriatit, të cilat kanë zanafillën që në fillimet e Islamit,

• figurën shkencore të dijetarit Abdullah ibn Mahmud el-Mavsili (el-Mosuli),

• metodologjinë shkencore të ndjekur në veprën El-Ihtijar.

Po ashtu, u trajtuan pikëpamjet e dijetarëve klasikë dhe bashkëkohorë mbi këtë vepër, si dhe pozita e saj në kurrikulat universitare të institucioneve të njohura islame, si Universiteti Al-Az’har, Fakulteti i Sheriatit në Sham, si dhe universitete fetare në Turqi dhe Irak.

Një vëmendje e veçantë iu kushtua pranisë së veprës “El-Ihtijar” në hapësirën shqiptare, duke theksuar:

• inkorporimin e saj në kurrikulën mësimore të Fakultetit të Shkencave Islame,

• përfshirjen e saj në bibliotekën akademike të Fakultetit,

• rëndësinë historike dhe kulturore të faktit që kjo vepër tashmë është e qasshme në gjuhën shqipe, përmes një përkthimi cilësor dhe profesional.

Në përmbyllje, Dekani shprehu falënderime të veçanta për tre komunitetet fetare islame, përkthyesit, redaktorët dhe për të gjithë kontribuuesit në realizimin e këtij projekti madhor shkencor, duke e cilësuar këtë botim si një arritje të rëndësishme për arsimin dhe kulturën islame në gjuhën shqipe.

Përfundimi i konferencës u shënua me shpërndarjen e certifikatave për kontribuuesit dhe me vlerësimin e lartë të rëndësisë së këtij botimi në forcimin e mendimit juridik islam dhe në ruajtjen e trashëgimisë shkencore islame.