Sot, më 29.04.2026, u mbajt me sukses Konferenca e Parë Studentore Shkencore, një ngjarje e veçantë akademike e organizuar nga studentët e Fakultetit të Shkencave Islame – Shkup.
Konferenca mblodhi studentë, profesorë dhe pjesëmarrës të shumtë, duke krijuar një hapësirë frymëzuese për prezantimin e punimeve kërkimore, shkëmbimin e ideve dhe zhvillimin e mendimit kritik. Studentët dëshmuan përkushtim dhe nivel të lartë akademik përmes prezantimeve të tyre, duke treguar rolin e rëndësishëm që kanë në avancimin e dijes dhe kërkimit shkencor.
Në hapje të konferencës, fjalë rasti mbajti Dekani i Fakultetit të Shkencave Islame – Shkup, Prof. Dr. Abdulxhemil Nesimi, i cili përgëzoi studentët për iniciativën dhe theksoi rëndësinë e aktiviteteve të tilla në fuqizimin e jetës akademike dhe kërkimit shkencor.
Po ashtu, përshëndetje dhe urime u përcollën edhe nga Reisul Ulema, H. Hfz. Shaqir Fetahu, i cili, duke qenë në një vizitë zyrtare në një konferencë botërore në Marok, dërgoi uratat e tij për këtë organizim, duke përgëzuar dekanin, studentët dhe studiuesit për realizimin e konferencës, si dhe duke u dëshiruar atyre suksese të mëtejshme në rrugën e dijes dhe kërkimit shkencor.
Falënderim i veçantë u shpreh për të gjithë organizatorët, mentorët dhe pjesëmarrësit që kontribuan në realizimin e kësaj ngjarjeje me sukses.
Kjo konferencë shënon një hap të rëndësishëm drejt krijimit të një tradite të qëndrueshme akademike, që do të vazhdojë të nxisë inovacionin, kërkimin dhe zhvillimin e studentëve në të ardhmen.

 

Fjalim i dekanit ne hapjen e Konferences se Pare shkencore te studenteve

“يَرْفَعِ ٱللَّهُ ٱلَّذِينَ آمَنُوا مِنكُمْ وَٱلَّذِينَ أُوتُوا ٱلْعِلْمَ دَرَجَاتٍ ۚ وَٱللَّهُ بِمَا تَعْمَلُونَ خَبِيرٌ

“Allahut i lartëson ata prej jush që besuan dhe ata që u është dhënë dija, në shkallë të larta. Dhe Allahu është Plotësisht i Dijshëm për atë që veproni”(El-Muxhadele : ajeti 11)
Të nderuar profesorë, studiues dhe kolegë akademikë,
I nderuar prodekan,
I nderuar Sekretar,
I nderuar Kryetar i Parlamentit studentor,
Të dashur studentë,
Të nderuar mysafirë dhe pjesëmarrës,
Zonja dhe zotërinj
Me kënaqësi të veçantë dhe me përgjegjësi institucionale, ju përshëndes sot në këtë ngjarje të rëndësishme akademike – Konferencën e Parë Shkencore të organizuar nga studentët e Fakultetit të Shkencave Islame në Shkup.
Es-Selamu alejkum..!
Te nderuar te pranishem,
kjo konferencë nuk përfaqëson vetëm një aktivitet universitar të radhës, por një moment domethënës në zhvillimin akademik të fakultetit tonë dhe një dëshmi konkrete të pjekurisë intelektuale të studentëve tanë. Ajo tregon se kultura e kërkimit shkencor po merr formë të qëndrueshme dhe se fakulteti po e përmbush misionin e tij themelor: formimin e mendjes kritike dhe të përgjegjshme.
Fakultetet nuk maten vetëm me numrin e studentëve apo programeve studimore, por me aftësinë për të prodhuar dije, për të nxitur mendim kritik dhe për të kontribuar në zhvillimin moral, intelektual dhe shoqëror të komunitetit. Në këtë kuptim, konferencat shkencore janë laboratorë të ideve, ku lindin pyetje të reja dhe ku sfidohen përgjigjet e vjetra.
Fakti që kjo konferencë është iniciuar dhe organizuar nga vetë studentët, i jep asaj një vlerë të veçantë. Kjo dëshmon se studentët tanë nuk e shohin dijen si një proces pasiv të marrjes së informacionit, por si një përgjegjësi aktive për të kërkuar, analizuar dhe kontribuar në ndërtimin e mendimit bashkëkohor.
Në veçanti, në fushën e shkencave islame, kërkimi shkencor bart një përgjegjësi edhe më të madhe. Ai kërkon balancë mes autenticitetit të traditës dhe sfidave të kohës moderne; mes ruajtjes së identitetit dhe nevojës për dialog me botën bashkëkohore. Pikërisht këtu qëndron rëndësia e institucioneve tona akademike: të formojnë studiues që dinë të lexojnë tekstin dhe kontekstin, trashëgiminë dhe realitetin.
Tradita islame e ka vendosur dijen në qendër të qytetërimit. Fjala e parë e shpallur ishte “Lexo”, duke e bërë kërkimin e dijes themelin e ngritjes njerëzore dhe shoqërore. Prandaj, çdo përpjekje akademike, çdo punim shkencor dhe çdo debat serioz është vazhdim i kësaj tradite fisnike.
Pjesëmarrja e studentëve dhe studiuesve nga trojet shqiptare e pasuron edhe më shumë këtë konferencë, duke e shndërruar atë në një hapësirë bashkëpunimi intelektual dhe shkëmbimi përvojash. Kjo na kujton se sfidat tona janë të përbashkëta dhe se zgjidhjet më të mira lindin përmes bashkëpunimit.
Në cilësinë e dekanit, shpreh krenarinë time për këtë iniciativë dhe për nivelin e angazhimit që studentët tanë kanë treguar. Ju nuk jeni vetëm përfaqësues të së tashmes së këtij fakulteti, por ndërtues të së ardhmes së tij.
Falënderoj organizatorët, profesorët mentorë dhe të gjithë ata që kontribuan në realizimin e kësaj konference. Kontributi juaj është investim i drejtpërdrejtë në cilësinë akademike dhe në identitetin shkencor të institucionit tonë.
Uroj që kjo konferencë të jetë fillimi i një tradite të qëndrueshme, ku studentët tanë do të vazhdojnë të jenë jo vetëm pjesëmarrës, por udhëheqës të proceseve akademike dhe shkencore.
Ju uroj punime të suksesshme, diskutime të thella dhe rezultate që do të tejkalojnë pritshmëritë tona.
Ju falënderoj për vëmendjen.
Faleminderit!